ജനനവും ജീവിതവും

ജനനം:
പൊക്കിള്‍ക്കൊടിയില്‍
ആത്മഹത്യക്ക് ശ്രമിച്ചതായിരുന്നു അവന്‍.
ആ ശ്രമത്തിനൊടുവില്‍,
പൊക്കിള്‍ക്കൊടി മുറിഞ്ഞ്
അമ്മയുടെ യോനീനാളത്തിലൂടെ
താഴോട്ട് വീണായിരുന്നു ജനനം.
ജീവിതം:
വച്ചു നീട്ടിയ ജീവിതത്തെ
തിരിച്ചെടുത്ത് അനുഗ്രഹിക്കാതിരുന്ന അമ്മ...
ദയാവധവും സ്വയഹത്യയും ,
ഗര്‍ഭാശയത്തിന് പുറത്ത് പാതകങ്ങളാണെന്ന തിരിച്ചറിവില്‍
ജീവിതം : കൊല്ലാനും, പിന്നെ കൊല്ലപ്പെടാനും!

ഒരു ഇടങ്കയ്യന്റെ കഥ

ഇടതുകയ്യില്‍ പേന പിടിക്കുന്നതുകൊണ്ട് ,
ടീച്ചറ് ബെഞ്ചിന്റെ വലത്തേ അറ്റത്തേക്ക് മാറ്റിയിരുത്തിയപ്പോഴാണ്
ജീവിതത്തിലെ ആദ്യത്തെ ഒറ്റപ്പെടല്‍

എഴുതുന്ന വലം കൈകള്‍ക്ക് ശല്യമാകാതിരിക്കാന്‍
ഒഴിഞ്ഞ ബെഞ്ചുകളില്‍ മാറിയിരിക്കണം എന്ന്
വര്‍ഷങ്ങളുടെ അധ്യയനം.

ഇടതും വലതും തിരിച്ചറിയാത്ത കീബോര്‍ഡിലൂടെ
മറ്റുള്ളവരില്‍ ഒരാളാകാന്‍ ശ്രമിച്ചപ്പോള്‍
ഇടം കയ്യില്‍ ഇടം കണ്ട മൌസ് ബട്ടണുകള്‍
വലതില്‍ നിന്ന് ഇടതിലേക്കുള്ള ദൂരം അയാളെ ഓര്‍മിപ്പിച്ചു കൊണ്ടിരുന്നു.

മിസാരു, കിക്കസാരു,ഇവസാരു

കണ്ണുകള്‍ , നാക്ക് , കാതുകള്‍
ഇവ നഷ്ടപ്പെട്ടപ്പോള്‍ ഞാന്‍ മൂന്നായി തപസ്സിരുന്നു.
അരുത് എന്ന് പറഞ്ഞവനെ മൌനം കൊണ്ട് പരിഹസിച്ചു
നഗ്നനെന്ന് വിളിച്ചവനെ കണ്ണടപ്പിച്ച് ഇരുട്ടിലാക്കി
കരച്ചില്‍ കേട്ടവനെ കാതടപ്പിച്ച് ബധിരനാക്കി

എന്റെ മൂന്ന് രൂപങ്ങള്‍ എന്റെ ഒരേ ഒരു കൈമുതല്‍
ഞാന്‍ നൂറ് കോടിയുടെ നാഥന്‍!